“عايزين نغني سطلانة زيكم”.. عمرو أديب يهاجم الأهلاوية

هاجم الإعلامي عمرو أديب، جمهور الأهلي بعد فوز فريق الزمالك على الشياطين الحمر بهدفين مقابل هدف، الأسبوع الماضي، في الدوري المصري الممتاز.

وأشار أديب، خلال برنامجه «الحكاية» على قناة «mbc مصر»، مساء الجمعة، إلى أن بعض رموز الأهلي، قللوا من شأن فوز الزمالك على الأهلي واستنكارهم سعادة مشجعي الفريق الأبيض، معقبًا: «بلاش الطبقية الكروية، كلنا ولاد دوري واحد.. بلاش تعالي».

وقال: «طيب ما أنتوا لما بتكسبوا بتقلبوا الدنيا، وبتحفلوا علينا، والأرض بتحمر، إنما نكسب إحنا، يطلع يقولك ده الجون فاول، إنتوا بعاتين العيال يخبوا الكور، يا عم قولي مبروك الأول، في يا عم الروح الرياضية».

وأضاف أديب: «فجاءة أدتوني إحساس إن الزمالك مش قد المقام، فيه إيه يا جماعة كسبنا، قولوا لنا مبروك، طول عمركم خاسرين سيئين (bad loser)».

وتابع: «ما تقولوا أن الأهلي تعبان ويستحق الخسارة، إيه حالة الكتمة اللي جت عند كل الأهلاوية، وممنوع التحفيل.. الأهلي يكسب نحتفل، الزمالك يكسب نكتم، عايزين نغني سطلانة زيكم».