تامر ضيائي في وصية مماته.. بلاش صدقة جارية تقليدية

تامر ضيائي في وصية مماته.. بلاش صدقة جارية تقليدية

الفنان تامر ضيائي

مروة الدقيشي

كشف الفنان تامر ضيائي عبر حسابه على الفيس بوك عن وصيته عند مماته، وذلك لتأثره بـ المرحلة المرضية التي تعرض لها.

وكشف تامر ضيائي في البوست الذي شاركة عبر حسابه الرسمي على تطبيق فيسبوك عن وصية مماته قائلا: «ده هيفضل باين على صفحتي لحد ما أموت.. الحقيقة اللى كلنا عارفينها ومتأكدين منها إننا كلنا ربنا كتبلنا إننا نموت فى ميعاد محدد غير معروف، وعشان كده كتبت الكلام ده لأني محتاج حاجات معينة تتعمل وحاجات خايف تتعمل وأنا مش عايز حد يعملها لمجرد إنها معروفة، ووقتها طبعاً مش هعرف أقولها لحد».

تامر ضيائي: صلاة الجنازة عليا أهم من حضور العزاء

وتابع تامر ضيائي «ودي وصيتي.. أولاً صلاة الجنازة أهم من العزاء وهى اللي كل ما العدد زاد كل ما ثوابي ما كان أكتر، فأرجوكم تصلوا عليا، وثانياً مش شرط تيجي العزاء وياريت لو اتعمل في البيت أو مكان بسيط بفلوسه تطلعولى صدقة جارية أفضل، وثالثاً من فضلكم لم يثبت أو يتفق عليه عمل خاتمة قرآن للمتوفي إنها هتوصله، بس مثبت إن الدعاء والصدقة بيوصلوا للميت، فرجاء دي بالذات بلاش وادعولي الوقت اللى هتقروا فيه جزء فضوا نفسكم واقعدوا ادعوا فيه، رابعاً بلاش صدقة جارية تقليدية وسهلة ومش مستفاد بيها، يعني المصاحف كتير فى مصر أوى وكل بيت فيه كتير، فممكن نحط الفلوس فى جامع بيتبني أو كرسي متحرك فى مستشفى يستفادوا بيه المرضى أو دخول مياه لبيت غلابة أو بناء سقف لبيت فقراء، حاجات ناس تستفيد بيها لمدة طويلة».

تامر ضيائي يوصي بترك الأصدقاء والأحباب يبكون عليه بعد وفاته

وأوصى تامر ضيائي محبيه بالوقوف على قبره للبكاء على فراقه وعدم منعهم بحجه أن المتوفي يتعذب من البكاء قائلاً: «خامسا دي نقطة مهمة أوي بالنسبة لي.. محدش يقول لحد بتعيط علي ليه، ومتعيطش عشان هو بيتعذب!! الكلام ده غلط، سيبوهم يعيطوا لحد ما يطلعوا كل الشعور اللى عندهم ومفيش حاجة بتقول إن العياط معناه عدم رضا بقضاء ربنا “وابيضت عيناه من الحزن فهو كظيم”، وسادسا أهم حاجة تانى هى الدعاء وبس والصدقة، وسابعا من فضلكم تكثفوا الدعاء وقت نزول القبر وتتصدقوا بأى حاجة بنية إن ربنا يجعل قبرى روضة من رياض الجنة ويثبتني عند السؤال لأن ده أهم وقت ليا وياريت كمان بعد ما تدفنوني تقعدوا معايا شوية ومتستعجلوش تمشوا عشان تونسوني فى ليلة زي دى».

وأضاف «وثامنا الموت علينا كلنا حق واحنا كلنا أمانات ربنا وهيردنا تاني، فالحزن على الفراق هونوه على نفسكم بالدعاء لي عشان أبقى في سعادة لحد ما أقابلكم تانى، وتاسعا اللي بيحبوني يدعولى كتير عشان لو مفيش حد يدعيلى، وعاشرا ودي مهمة أوي أوي أوي عاوز الكل يسامحني على أي حاجة عملتها فيه بقصد لو بدون قصد».

واختتم تامر ضيائي وصية مماته قائلاً: «اللهم إن كثر موت الفجأة من حولي وكثر موت الشباب غفلة، فيارب إن كنت أنا القادم فأحسن خاتمتي ويسّر طلوع روحي وهوّن عليّ سكراتي فإني أحب أن أرحل في هدوء وسكينة وطمأنينة، ولا تقبض روحي إلا وأنت راضٍ عني لكي أكون عبدا مقبولا عندك حتى أليق بلقائك العظيم، وإن كان لي من العمر باقٍ فاغفر لي ذنوبي ومعاصي نفسي الأمّارة بالسوء واعفو عني وامحو لي كل ما يعرقل طريقي إليك وردّني إليك ردّاً جميلاً يا رب العالمين».

اقرأ أيضاًآية سماحة توجه رسالة لصناع العمل بعد حكاية كاملة «فيديو»

nabd

المصدر: وكالات